رئيس مجلس الادارة:
د. سامي طايع
رئيس التحرير
محمد متولي فضل

صباح الخير عليكم يا مصريين .. استعير عبارة يا مصريين من الرئيس السيسي .. ولأن خاطرتي عنه وعن الدستور فرجاء أن يسامحني. الخاطرة باختصار تتناول موضوع الدستور اللي الدنيا مقلوبة علشانه .. وزي ما يكون البلد رايحه في داهية بسبب تعديل فقرات في دستور مصر الحديث..
بصراحة أنا مش فاهم حكاية الهري اللي حاصل بين الناس وبعضها حول هذا الأمر.. ببساطة الدستور ده شوية مواد اجتمع خمسين بني آدم من الشعب واختاروها لتكون منهاج تستخدمه الدولة في تمشية الأمور بالشكل اللي يخرج البلد من البلاوي اللي كانت فيها.
طيب خلال الـ كام سنة اللي فاتت واحنا عارفين ان الدستور محترم وما عليهوش اي تراب يعني غبار وفجأة خرج علينا البرلمان بأنه يريد تغيير فقرات منه علشان الدنيا تمشي ونحسن من بعض البنود لمصلحة البلد.
هل ده فيه حاجة تزعل .. أنا مش فاهم ليه البعض هايج على الموضوع ده .. يعني لو ما البرلمان ما جابش سيرة مد فترة الرئاسة وقال انه راح يغير كل فقراته ولا كان حد اتكلم ولا فتح بقه.
بالذمه ده كلام يا مصريين .. والله انكم شعب غلبان سياسيا وسامحوني ولا فاهمين حاجة في السياسة لغاية النهاردة .
يعني يا مصريين الشر بره وبعيد عميتم عن التطوير اللي بيحصل في مصركم الغالية .. والله أنا شخصيا مش مصدق اني عشت لغاية ما شوفت اللي بيحصل في مصر.. على ايدين السيسي اللي عاوزين نمد له فترة الرئاسة.
تصدقوا بالله وأقسم به سبحانه وتعالى ان أقول لكم انا عشت بره في اعتى بلاد السياسة والديموقراطية اكثر من اربعة عقود ما شفتش نهضة ولا تطوير ولا تغيير المجتمع من جذوره زي ما بيحصل في مصرنا الغالية عليه قوي.
إيه يا جماعة الخير ما حدش منكم شايف اللي بيحصل .. انا كل يوم اصحى من النوم الاقي الدنيا بتتغير وبحس بالتغيير .. بلاش اقول الطرق اللي كنت بسوق فيها من طريق مصر اسكندري الصحراوي .. صحراوي ايه بقى .. ده بقى احسن من اي طريق في الدنيا كله زراعات ومدن .. كنت بسوق علشان اروح مدينة الانتاج الاعلامي لما كنت بشتغل في قناة الغد مع صديقي عبد اللطيف المناوي اللي طورها وخلاها قناة تتشاف.. والحمد لله لما سابها مسكها واحد محترم ابن فلسطين حبيبتي الاستاذ احمد الحزوري، الشارع كان مكسر وكنت بروح في ساعة ونصف الساعة .. وبعد تطوير الشارع وبناء الكباري كان يدوبك خمسة وعشرين دقيقة اكون في الاستوديو.
بلاش الشوارع والطرق والكباري الجديدة اللي مالية مصر كلها .. نروح للزراعات .. نهار أبيض زراعات ومزارع سمكية ومحطات تحلية ومحطات كهربا ومدن ومواني جديدة واسلحة متطورة للجيش والبحرية والطيران.
بلاش كمان دول تعالوا نشوف مع بعض صحة البني ادمين .. يعني انا مثلا بتعالج في لندن ولكن من يوم ما رحت التأمين الصحي هنا وكل ما احتاجه من دوا للسكر والضغط والبروستاتا والكروسترول والعمود الفقري والام العظام .. اي والله الحمد لله كل ده لكن زي الحديد ما تخافوش عليه .. المهم رحت علشان اعمل اشاعة رنيم عملوها على ضهري مؤخرا .. وبلاش التأمين الصحي لأن فيه بعض المشاكل علشان الزحمة لكن واحد حبيبي من المسؤولين في التأمين الاستاذ ممدوح في مستشفى الهرم قالي فيه صرح في الحي السابع في مدينة السادس من اكتوبر سيكون على مستوى عالمي تبع التأمين فرحت جدا ..
وفي نفس الموضوع لما دخلت التأمين الاسبوع اللي فات لقيت حملة مليون صحة ولقيت حد بيسألني عملت تحليل فايروس سي والضغط والسكر .. قلت له لأ خدني وقام بعمل التحليل سألته ايه ده بقى قال لي دي مبادرة الرئيس السيسي لعلاج فايروس سي في مصر كلها والكشف على صحة مصر كلها الحمد عملت التحليل وبعد ساعة اخدته وحمدت ربنا اني معنديش سي ولا وصاد لكن لقيت السكر ابن الايه مرتفع جدا هو والضغط .. لكن مقدور عليهم وبناخد لهم علاج مصري لما اكون في مصر وعلاج انجليزي لما بسافر للندن كل اربع شهور.
اقول ايه واللا ايه عن اللي بيحصل في مصر والله انا مش مصدق عنيه.. اول ما سافرت لندن في اوائل السبعينات انبهرت بالنظام والنظافة واشارات المرور بكل شيء .. وكنت بشتغل في جريدة العرب الدولية اول جريدة عربية في اوروبا كلها وكنت بكتب عمود خواطر من وقت لآخر فانفعلت وقلت في عامود .. ياما نفسي اشوف بلادنا مثل بلاد الخواجات .. وبالطبع انفعلت في الموضوع وعددت محاسن البلد البريطاني .. والحقيقة النهارة وبعد اكثر من تلاتة وأربعين سنة ممكن أقول وأنا في لندن ياما نفسي أشوف بلاد الانجليز زي بلاد المصريين.
اخيرا دستوركم معاكم يا أسيادنا .. لازم الشعب ينزل ويقول نعم وألف نعم لتمديد مدة رئاسة السيسي وياريت طول ما هو شغال كده نمد له ولكن لو رجع في كلامه في أي يوم .. أهو احنا عرفنا الطريق نعمل استفتاء ونقول له كتر خيرك .. ويا ما نفسي ما موتش قبل ما شوف كل الاحلام اللي بيحلمها الراجل ده تتحقق.
يا اللا يا مصريين استعدوا وقولوا نعم ومليون نعم للتغيير.
العمدة محمد فضل الجمعة 5 ابريل 2019

رأيك في الموضوع

HELIX_NO_MODULE_OFFCANVAS